ကျွန်တော်ထင်သလောက် ကြွက်သား မတက်ဘူး ဆရာ
ယောက်ျားလေးတွေ ကိုယ်ခန္ဓာအလှအပ ပိုမိုက်လာဖို့၊ ကြံ့ခိုင်သန်စွမ်းဖို့၊ ယောက်ျားပီသဖို့ အစရှိတဲ့ ရည်ရွယ်ချက်တွေနဲ့ Gym သွားပြီး လေ့ကျင့်ခန်းပိုလုပ်လာကြပါတယ်။ ဒါပေမယ့် လူနည်းစုလောက်ကပဲ သူတို့လိုချင်တဲ့ ခန္ဓာကိုယ်အချိုးအစားကို ရသွားကြပြီး ကျန်တဲ့သူတွေကတော့ အချိန်ကုန်၊ ပိုက်ဆံကုန်ပြီး လူပင်ပန်းတာပဲ အဖတ်တင်ရင်း ဒုံရင်းကနေ မတက်သွားနိုင်ကြတာကို သတိထားမိပါတယ်။
ဘာကြောင့် လေ့ကျင့်ခန်းလုပ်သလောက် ကြွက်သားမတက်ရတာလဲဆိုတဲ့ အကြောင်းရင်းတွေကို စစ်ဆေးကြည့်တဲ့အခါ တူညီမှုအနေနဲ့ တွေ့ရတာကတော့
၁။ လုံလောက်စွာ မစားသုံးခြင်း
Gym ဆော့ပြီဆိုရင် ခန္ဓာကိုယ်က ပုံမှန်ထက် အားအင်တွေကိုပိုအသုံးပြုရသလို၊ စုတ်ပြဲသွားတဲ့ တစ်ရှူးနေရာမှာ ကြွက်သားနဲ့ အစားပြန်ထိုးဖို့ အစာအာဟာရကို ပုံမှန်ထက် ပိုစားသုံးပေးဖို့ အရမ်းအရေးကြီးပါတယ်။ ဒီတော့ ကိုယ်က ပုံမှန်လောက်ပဲ စားပေးမယ်၊ ဒါမှမဟုတ် အစားလျှော့စားနေပြီဆိုရင်တော့ ဘယ်လိုမှ ကြွက်သားတက်မှာမဟုတ်ပါဘူး။
၂။ စားသင့်တာတွေ မစားခြင်း
များများတော့ စားပေးပါတယ်၊ ဒါပေမယ့် စားလိုက်တာတွေက အာဟာရလည်းမဖြစ်ဘဲ အဆီနဲ့ ကယ်လိုရီတွေပဲ တက်တဲ့ အစားအစာတွေ၊ အသင့်စား အစားအစာတွေပဲ ဖြစ်နေရင်တော့ ကြွက်သားမတက်တာ ထူးဆန်းတဲ့ကိစ္စတော့မဟုတ်ပါဘူး။ ယောက်ျားလေးဖြစ်စေ၊ မိန်းကလေးဖြစ်စေ လေ့ကျင့်ခန်းလုပ်ပြီဆိုရင် ကြွက်သားတက်မြန်ဖို့၊ ဝိတ်ကျဖို့ ပရိုတင်းဓာတ်၊ ကစီဓာတ်နဲ့ ကျန်းမာတဲ့ အဆီဓာတ်တွေကို များများစားသုံးပေးဖို့ လိုသလို၊ တစ်နေ့တာမှာ သတ်မှတ်ထားတဲ့ အစာအုပ်စုတွေကို စုံလင်အောင် စားပေးဖို့လည်း အရေးကြီးပါတယ်။
၃။ စားတဲ့နည်းလမ်း မှားယွင်းနေခြင်း
တစ်ကြိမ်တည်းမှာ ပမာဏအများကြီး စားလိုက်တဲ့အခါ ခန္ဓာကိုယ်က အာဟာရဓာတ်တွေကို နိုင်သလောက်ပဲ စုပ်ယူသွားပြီး ကျန်တဲ့အစားအစာတွေက အားအင်အဖြစ် အသွင်ပြောင်းပြီးတဲ့အခါ ဝမ်းအနေနဲ့ပဲ ခန္ဓာကိုယ်အပြင်ဘက်ကို ထွက်သွားပြီး အလဟဿဖြစ်သွားမှာပါ။ ဒီတော့ ကြွက်သားတက်ဖို့ ပမာဏနည်းနည်းနဲ့ အကြိမ်ရေများများ စားပေးဖို့ လိုပါတယ်။
၄။ အိပ်ချိန်မပြည့်ဝခြင်း
လေ့ကျင့်ခန်းလုပ်နေသူတိုင်း မဖြစ်မနေလိုက်နာရမယ့် အချက်ထဲမှာ အိပ်ချိန်ပြည့်ဝမှုလည်း တစ်ခုအပါအဝင်ပါပဲ။ ယောက်ျားလေးတွေ လေ့ကျင့်ခန်းအပြင်းအထန် လုပ်တဲ့အခါ ကြွက်သားမျှင်တွေ စုတ်ပြဲသွားပြီး ခန္ဓာကိုယ်က အားအင်တွေကုန်ခမ်းသွားတာကြောင့် အိပ်ချိန်နဲ့ ဒါတွေကို ပြန်အစားထိုးဖြည့်ပေးမှ ကြွက်သားတက်မြန်မှာပါ။
၅။ လေ့ကျင့်ခန်းလုပ်တဲ့ နည်းလမ်းမှားယွင်းနေခြင်း
လေ့ကျင့်ခန်းလုပ်တဲ့အခါ ကြွက်သားတွေ စနစ်တကျဖြစ်တည်လာဖို့ဆိုတာ မှန်ကန်တဲ့ လေ့ကျင့်ခန်းကို မှန်ကန်တဲ့နည်းလမ်းနဲ့ ဆော့ပေးဖို့ လိုပါတယ်။ ရင်အုပ်လေ့ကျင့်ခန်းမှာ လက်မောင်းကို အားစိုက်ညှစ်နေရင်တော့ ကြွက်သားမတက်တာ ထူးတော့ မထူးဆန်းဘူးပေါ့ဗျာ။
၆။ ဝီရိယမရှိခြင်း
Gym ကို ဆော့လိုက်၊ ပျက်လိုက်လုပ်တာ၊ Diet တစ်ရက်လုပ်ပြီး ကျန်တဲ့ရက်တွေမှာ စားချင်တိုင်း စားမယ်၊ သတ်မှတ်ထားတဲ့ ရက်အတိအကျမှာ ကြွက်သားအုပ်စုတစ်မျိုးတည်းကို သတ်မှတ်ပြီး မဆော့ဘဲ ဆော့ချင်တာဆော့မယ်ဆိုရင်တော့ လိုချင်တဲ့ပန်းတိုင်ရောက်ဖို့ဆိုတာ အလင်းမိုင်ပေါင်းများစွာ ဝေးကွာနေဦးမှာပါ။
၇။ လေ့ကျင့်ခန်းအပြင်းအထန်လုပ်ခြင်း
Gym ဆော့ပြီဆိုရင် တော်တော်များများက အကြိမ်ရေများများဆော့မှ အကျိုးအာနိသင်ရှိတယ်ထင်ပြီး လိုတာထက် လေ့ကျင့်ခန်းပိုလုပ်တတ်ကြပါတယ်။ ဒီတော့ အကြိမ်ရေအများကြီးဆော့ပြီး မလိုအပ်တဲ့နေရာမှာ အားအင်ဖြုန်းတာထက် အကြိမ်ရေနည်းနည်းနဲ့ လေ့ကျင့်ခန်းကို ထိရောက်အောင် ဆော့ပေးတာ ပိုကောင်းပါတယ်။
၈။ ရေသောက်နည်းခြင်း
လေ့ကျင့်ခန်းအပြင်းအထန်လုပ်တဲ့ ယောက်ျားလေးတွေမှာ တခြားသူတွေထက် ခန္ဓာကိုယ်က ရေဓာတ်ခန်းခြောက်မှုပိုဖြစ်နိုင်ပါတယ်။ ရေဓာတ်ခန်းခြောက်တဲ့အခါ ခန္ဓာကိုယ်က ပိုပြီးပင်ပန်းနွမ်းနယ်သလို၊ လေ့ကျင့်ခန်းလုပ်ဖို့ အားစိုက်ထုတ်မှုနည်းသွားတယ်။ ခန္ဓာကိုယ်က ကုန်ဆုံးသွားတဲ့အားအင်တွေကို ပြန်ဖြည့်ပေးဖို့ရော ကြွက်သားအသစ်တည်ဆောက်ဖို့ပါ အချိန်ပိုကြာသွားနိုင်ပါတယ်။
သင်ကိုယ်တိုင်ရော ဒီအချက်တွေ လုပ်မိနေရင်း ကြွက်သားအတက်နှေးတဲ့ ပြဿနာတွေ ကြုံနေရပြီလားဆိုတာ ကိုယ့်ဖာသာ ပြန်ပြီးသုံးသပ်ကြည့်သင့်ပါတယ်။
ရဲမျိုးမြတ်